बोतल सारेको टिममाथि जरिवाना हुन सक्ने


 प्रायोजकहरूले उपलब्ध गराएका पेय पदार्थका बोतल खेलाडीले वरपर सारेमा सम्बन्धित टिममाथि जरिवाना हुन सक्ने युइएफएले जनाएको छ । यसअघि सोमबार रोनाल्डोले कोकाकोलाका दुईवटा बोतल हटाउँदै मानिसहरुलाई पानी पिउन प्रेरित गरेका थिए भने पाउल पोग्वाले बियरको बोतल हटाएका थिए ।

त्यस्तै इटालीका म्यानुयल लोकाटेल्लीले कोकाकोलाको बोतल भएका ठाउँमा पानी राखेका थिए । ‘प्रतियोगिताको आयोजना र युरोपभर फुटबलको विकासमा सहकार्य महत्वपूर्ण छ भनेर सहभागी टिमहरूलाई युइएफएले स्मरण गराएको छ,’ प्रतियोगिताको आयोजकले बिहीबार भन्यो ।

युइएएफए युरो २०२० प्रतियोगिताका निर्देशक मार्टिन केल्लेनले प्रतियोगिताका नियमहरु खेलाडीले पालना गर्नुपर्ने बताए । यद्यपी, पोग्बाजस्ता खेलाडीले धार्मिक कारण देखाएर बोतल हटाएको कुरालाई आफुले बुझ्ने उनले बताए । पोग्बा मुस्लिम धर्मका अनुयायी हुन् ।

युईएफएले आफ्ना सम्झौता र नियमहरु टिमलाई स्मरण गराएको र अनुशासनको कदम चाल्न सक्ने पनि जानकारी गराएको केल्लेनले बताए । यद्यपी, युईएफएले सिधैं खेलाडीहरुलाई भने कारबाही गर्ने छैन । ‘हामीले युईएफएको तर्फबाट खेलाडीलाई सिधै कहिल्यै कारबाही गर्दैनौं ।

हामी सधैं सहभागी राष्ट्रिय संघका तर्फबाट यस्तो गर्छौं र उनीहरुले खेलाडीलाई थप के गर्ने भनेर तय गर्नेछन् । तर, हामी अहिल्यै सिधै खेलाडीलाई कारबाही गर्ने छैनौं ।’ उनले भने, ‘प्रतियोगितामा समावेश संघहरूले हस्ताक्षर गरेका नियमहरु हामीसँग छन् ।’

Post a Comment

0 Comments