भीडको अगाडि गोली हानेर मृत्युदण्ड

 

यमनको राजधानी सानामा बालबालिकाको हत्याका दोषी अपराधीहरुलाई मृत्युदण्ड दिइएको छ । उनीहरुलाई दिइएको मृत्युदण्ड निकै डरलाग्दो थियो । राजधानी सानामा कब्जा गरिसकेका हुथी विद्रोहीहरुले हत्याका तीन आरोपीहरुलाई बीच सडकमा ठूलो भिडको अगाडि लिएर गए । आरोपीहरुलाई सडकमा सुताइयो र मृत्युदण्ड दिन तोकिएका व्यक्तिले एके–४७ बन्दुकले गोली हानेर आरोपीहरुलाई मारिदिए । मारिसकेपछि उनहिरुको लाशलाई क्रेनको सहायताले आवामा झुण्ड्याइयो ।
पछि ती आरोपीहरुको शवलाई कपडामा बेरेर त्यहाँबाट हटाइएको थियो । हत्याका आरोपीहरु ४० वर्षका अली अल नामी, ३८ वर्षका अब्दुल्ला अल मखली र ३३ वर्षका मोहम्मद अरमान भएको बताइएको छ । मृत्युदण्डका लागि ल्याइँदा तीनै जना आरोपीहरुले जेलको नीलो कपडा लगाएका थिए। केही समयमै उनीहरुलाई एक–एक गरेर सडकमा बिच्छ्याइएको कपडामा एक अर्काको सामुन्ने पर्ने गरी सुताइयो । यस क्रममा ठूलो संख्यामा मानिसहरुको भीड त्यहाँ थियो ।
डेलीमेलको रिपोर्टअनुसार यसरी उनीहरुलाई मृत्युदण्ड दिइँदै गर्दाको भिडियो त्यहाँ जम्मा भएको भीडमा भएका मानिसहरुले बनाएका थिए । यी तीनैजनालाई पिठ्युँमा एके ४७ बन्दुकले गोली हानिएको थियो । उनीहरुको घटनास्थलमै मृत्यु भयो । त्यसुपछि उनीहरुलाई रातो कपडामा बेरेर अर्को ठाउँ लगियो । अगस्ट २०१८ पछि यमनको राजधानी सानामा कसैलाई सार्वजनिक रुपमा मृत्युदण्ड दिइएको यो पहिलो पटक हो । गोली हानेर आरोपीहरुलाई मारिसकेपछि विद्रोहीहरुले मानिसहरुमा अपराध गर्न डर होस् भनेर उनीहरुको शव केहीबेर त्यहीँ झुण्ड्याए ।
यमन २०१४ देखि गृहयुद्धमा फसेको छ । साउदी अरबको नेतृत्वका गठबन्धन देशका सेना विद्रोहीसँग लडिरहेका छन् । यो युद्धको क्रममा १ लाख ३० हजार जना मारिइसकेका छन् । कैयौं अन्तर्राष्ट्रिय संस्थाहरुले यसरी मारिने अधिकांश महिला र बालबालिका भएको बताएका छन् । यी विद्रोहीले यमनको सीमाबाट साउदी अरबको तेल डिपो र रिफाइनरीमा ड्रोन आक्रमण गरिरहन्छन् । गएको मार्चमा साउदी अरबले हुथी विद्रोहीहरुसँग युद्धबिरामको प्रस्ताव गरेको थियो तर विद्रोहीहरुले यसलाई अस्वीकार गरे ।

Post a Comment

0 Comments